‘A’amu, Ta’ere, ‘ihi’ite

Détails

Catégorie : Fa'ari'ira'a

Publié le jeudi 7 juin 2012 08:04

Écrit par Super Utilisateur

Affichages : 208

I te mahana piti 5 no tiunu 2012 e ‘itehia te terera’a o te feti’a Taurua na rōpū i te Fenua e te Mahana i Porinetia farani. I muta’a iho ra, te taime hope’a roa a ‘itehia ai te reira i Tahiti e i Moorea, na te tapena Tute (James Cook) te reira i fa’ata’a mai i tō na tere mātāmua na teie pae no te moana Patitifa ‘Apato’a, i te matahiti 1769 ra. Mai taua taime ra ua tupu fa’ahou teie fa’anahora’a huru varavara mau i te ara, i te matahiti 1874 ra, i te matahiti 1882, e i muri mai i te matahiti 2004 ra. I te ‘āva’e no tiunu 2012 e haere mai nei, e tupu te terera’a hope’a o Taurua no teie tau tenetere, e tupu ia te terera’a i muri mai i te matahiti 2117 !

    E ta’ata tuiro’o te tapena Tute i te pae no te fanora’a na te moana e te māta’ita’ira’a i te ao, ua ‘ite-ato’a-hia te mā’ohi ‘ei feiā ‘aravihi no te fanora’a na te moana e ua ‘ati o Patitifa i te terehia e rātou. ‘Aua’e maoti tō rātou mau va’a tau’ati, ua tāpae rātou i na poro e toru o te ao mā’ohi, ‘oia ho’i o Aotearoa, o Rapa-Nui e o Vaihī mā. I taua tau ra, aita ia te nūna’a no ‘Europa i fa’aru’e atu ra i te hiti o tō rātou mau fenua, ua fano noa rātou i te roto moana no Metiterane e i te hiti fenua i te moana Ateranetito. Te ho’i mai ra te peu tahito no te fanora’a moana, ‘inaha e rave rahi mau terera’a va’a tau’ati e fa’anahohia nei i teie mahana. Ua tupu te tahi terera’a i te ‘āva’e tītema 2010, o tei fano ti’a atu fenua Taina mai Tahiti atu nei.

    E rave rahi mau ‘ōro’a e fa’atupuhia no te fa’ahanahanara’a i te terera’a o te feti’a Taurua, e vauvauhia ia te reira i ni’a i teie tahuauira. Ua fa’ata’ahia te hō’ē tōmite arata’i no te tuatāpapara’a e no te fa’anahora’a i te mau parau ‘āpī i ni’a i teie tumu parau. Te hina’aro nei mātou ia tui te ro’o o teie fa’anahora’a ‘ati a’e te ao, ia ‘itehia tō na faufa’a i te pae no te ‘ā’amu, te tā’ere e te māramarama mā te heheu ato’a i te ‘ite i te pae no tuatāpapara’a i te mau feti’a. E taime tano ato’a teie no te tā’atira’a i te mau nūna’a mā’ohi ato’a e tō te ao tā’ato’a o te ta’iruru mai no te hi’opo’ara’a i teie tere no te feti’a Taurua. No te mau ha’amāramaramara’a hau atu a ani hua mai mā te fa’a’ohipa i teie ratauira Cette adresse e-mail est protégée contre les robots spammeurs. Vous devez activer le JavaScript pour la visualiser.